أسير الغرام
ـــــــــــــــــــــــــ
حبيبي يا واخد قلبي أسير
غرامك اونطه وكلامك كتير
وشاطر بتبلف قلبي الكبير
......
مشخبط المنطق وعندك فصام
تلخبط وتنطق عجيب الكلام
تقدم رجوعك وتشبع بجوعك
واخدني في طوعك وشادد لجام
......
في صمتك تملي معاني وفروق
وف لحظة تجلي تبص لفوق
فتنطق عجايب تغيظ الحبايب
يا حاضر وغايب وغايبه الحقوق
......
في حبك يا روحي شربت المرار
وزادت جروحي وجالي انهيار
وصابر كتوم ويوم بعد يوم
بشوف النجوم في عز النهار
......
وقلبي يا بيبي نبضه ضعيف
يا قدري ونصيبي وجايبلي الخفيف
يا اكبر ذنوبي وأسوأ عيوبي
منفض جيوبي وعامل شريف
......
حكيم الليالي يا غاوي القصور
بحبك يا غالي وقاتلني الشعور
ومهما يلوموني في حبك جنوني
مغمض عيوني وساحبني ف طابور
......
أقدم يا روحي فروض الولاء
بتقتل طموحي وأي انتماء
وابعت آمالي تسمي بدالي
وتدعي يا غالي عليك بالفراق
القوّال سيوفى
ليست هناك تعليقات:
إرسال تعليق