بوهالي
وانا ف الغربة يادادة
سايح امتلف اسعادة
طالع لعقابي ف جبادة
من بكري وانا غادي جاي
ياجراحي مابغيتي تبراي
وامالكي ماعارفة تنساي
ياك الكمرة والنجمة تعرف
حالي هذا وكيف نتصرف
وانا بعقلي غير نتلف
خليوني عافاكم داوي
مجذوب الحال عود وجاوي
صابر لحكام وجيب خاوي
قفثي على كثافي مرفقاني
وعصاتي معايا مصاحباني
غادي جاي ويكون ف عواني
فايق بكري حرقة ف صدري
وانا مسري معانق فجري
فين غادي لا لا ندري
حالي من دون الناس هضرة
عكازي قنديل الحضرة
خايداني ضرايح بالمرة
ياك طالع جبال يوم وعلى يوم
ف السرة وزيداها ف الشوم
وانا حالي سيادي مهموم
ماديرو بيدي ولى شريت
ولى سيادي ليه قربت وجيت
ولى عشقتو حبيت وبغيت
دابا يجي لحساب ونفوتو
تمشي دنيا ياك نموتو
كل واحد يتسنى نوبتو
ماقاطع لياس عندي ربي
فيه ظني ياك حاجتي وحبي
في قلبي شاكي ليه غلبي
وانا فالغربة يادادة
سايح امثلف اسعادة
طالع لعقابي ف جبادة
بقلم صقر الحروف الزجال
المحجوب بوسبولة
ليست هناك تعليقات:
إرسال تعليق