حوار مع القلم"
--------------------
قلمي لقيته ف يوم مخاصمني
قاللي خلاص مش هاكتب تاني
إوعى تكون قررت تبيعني
إيه خلاك فجأة بتعصاني
قاللي ياصاحبي ازاي تخدعني
وتقوللي الأحوال عجباني
وازاي تعمل نفسك راضي
وبتعزف ألحان وأغاني
داحنا ياصاحبي الهم راكبنا
من كتر الأحزان بنعاني
راحت فين الضحكة الحلوة
اللي تخلي الدنيا تلالي
راحت فين الكلمة الهادفة
اللي وراها حكم ومعاني
ليه أصبحنا بدون أخلاق
والمظلوم بقى زي الجاني
أنا معرفش ياصاحبي أنافق
والكذب يكسرلي سناني
دايما اعبر عن إحساسك
وأنا في إيديك باشعر بكياني
مش عاوزين الموج يجرفنا
وياخدنا التيار ونعاني
لما هنكتب عن أحوالنا
ولمبادئنا نعود من تاني
راح تلقاني معاك ومطاوعك
والدنيا تكون مش سايعاني
----------------------------------
بقلمي: م/ محمود الحريري
ليست هناك تعليقات:
إرسال تعليق