سلاماً على الجهلاء
سلاماً على
الجهل والجهلاء دي
خلق ضايعة وبايعة
العقل من بدري
يقولك العلم
هنا جوه الرأس
ولا تقولي في الكراس
تعالى الفهم هنا حصري
ولا تقولي
علم ولا شهادات
ولا مذاكرة وامتحانات
فهمت الفوله من صغري
ولا تقولي
الطبيب ده قال
ولا المهندس ده عاد
ولا تسمع كلام افندي
يقولك
في مدرسة الحياة
أتعلمت ربيت وفهمت
تعالى افهم هنا عندي
ولا تقولى
مدارس ولا تلاميذ
ولا كتبات ولا كراريس
مين في الفهم هنا قدي
وبفهم
في كل علوم الكون
على كل صنف ولون
خسارة الفهم من بعدي
وبتقولي
حالنا ليه سيء
ومن سيء الي أسوأ
وليه حالنا كده مزري
بدال
الجهل سيد الموقف
ومتحكم ومسيطر
وماسك لجامنا وبيجرى
هيفضل
حالنا نفس الحال
وأمر نهضتنا محال
ودي خبيتنا من بدري
شاعر العامية
عبد المنعم حمدي رضوان
ليست هناك تعليقات:
إرسال تعليق