حرفي
حرفي طرق بابي بقطراتو
ف عماق خيالي خيراتو
جاي ف قصيدة شهدة جديدة
جاي ف سويعات ياك فريدة
وبسلهامو ظاهر باين
حرفي في صورة مايحضر
جاي يزرع يغرس لخضر
حرفي ماصل ولد بلادو
وخصيم بحالو وعنادو
جاي يوصلني لمكانو
جاي وعارف سر عنوانو
ف قدومو ولقى اعبيرو
ورمى زهارو ياك زاد خيرو
من الجنة بانت انوارو
من الحنة زركش اسرارو
اربيع فصولو ياك اية
امرافقني حرفي معايا
شهدوا ياناس لبسني لباس
خلاني بتاجي فوق الراس
حاضر كلمة نغمة ومعنى
حاضر واضح مايتسنى
بيه طيور فسماها مغردة
بيه لقات طريق كل مشردة
به مدحوا المداحة البارح
عمت الفايدة زودت الفارح
هذا حرفي ساكن ولفي
هذا حرفي رقص طرفي
كلمرة ف حلة منغومة
كلمرة لبسة منسومة
ساير ف سفينتو يتكلم
نجني الفايدة منو مسلم
هذا حال حرفي ومداوم
يااهل الحرف طايع غانم
كلمات صقر المغرب الزجال
بوسبولة المحجوب
ليست هناك تعليقات:
إرسال تعليق