طعم الأيام
واهي ديه النظرة اللي بتوزن . طعم الأيام
لا عارفها بتضحك ولا قادر . توصفها كلام
بنتوه في ملامح رسماها . ونقول ياسلام
نسأل ع الدنيا واخبارها . هيقولوا تمام
رغم الاوجاع ولا الأحزان . كاتمين بلجام
والبسمة الحلوة بتخطفها . لحظة أوهام
بتدور تبني ف احلامهما . من فين وبكام
واللقمة كمان لما تطولها . متعاصة آلام
لو تقدر توصف في مرارها . واللهِ ما تنام
هتفكر حتى ف اعذارها . هتصرخ دا حرام
ديساها الدنيا بتكسرها . والناس في زحام
نسينها ودايرين في الساقية . وف ارض ضلام
والكفة بيتقل في ميزانها . مليانة غَمام
والضحكة بتطلع بالدمعة . بتحدف في سهام
يا سلام ع الوش اما بيكدب ويبان اهرام
بتعدي سنينها بتترمم . ووجودها عَلام
مهما بنتعلم في كتابها . مليان ابهام
وبننده ونقول ياغلابة . وماليها ختام
من ديوان( خارج عن المألوف )
شادوليات
نسير دائما خارج السرب
شاذلي محمد عبدالرحمن حسين .
ليست هناك تعليقات:
إرسال تعليق