غربة صعبة
إمته أنسى هو ليه مش قادر أنسى
نفسي أنسى كل حاجة
نفسي أنسى الحكاية
ولا هو ده طريق ومالوش نهاية
نفسي أهرب من عيونك
نفسي أقولك خلاص كفاية
نفسي قلبى إللى حبك
مره وحده يكون معايا
هو ليه إنت عيشه
عيشه فيه رغم إنك مش معايا
كل حاجه ليه فاكرها
حتى وإنت وقفه قدام المرايا
وإنت بتقولي صحيت
طب نزلت طب وصلت مين معاك
طب وصلت الساعه كام
طب فاكرني لاء نسيت
طب وحشتك أد إيه
النهارده الجو برد فيه سنو
ح افتح الفون تشوف شكل الشوارع
نفسي أشرب قهوه ناويه أنزل
بعد ساعه عندي جلسة
بس نفسي تكون معايا
أمته يجي الصيف وأنزل
نفسي أشوفك فى المطار
نفسي نقعد فى المكان
إللى شوفتك فيه هناك
نفسي أمسك إيدك
نفسي على كتفك أنام
هو إنت لسه فاكر
طيب إحلف يالله أسيبك فى أمان
لما أرجع ح أبقى أرن
لسه فيه بنا كلام
ح أبقى أقولك ليه عرفتك
ليه بحبك ليه بزورك فى المنام
ح أحكي تانى نفس الحكاية
نفسي تعرف إن إنت جوه قلبي
حتى وإنت بعيد هناك
بس هيه غربه صعبة
غربه صعبه وإنت مش مش معايا
غربه صعبه هيه دى كل الحكاية
مش معايه بس كتير بحبك
أوعه تنسى الكلام
أوعه تاني تقولي نفسي نفسي أنسي
كنت أنا قدرت أنسى من زمان
أه بحبك مهما كان
مهما قالوا كتير عليك ده كلام
نفسي تفهم حاولت أنسى
غصب عني لاقيتني أه بحبك
لسه أكتر من إللى كان
شعر
على أبو السعود
ليست هناك تعليقات:
إرسال تعليق