كلمة عمى وخالى
كلمة مقامها عالى
للي يفهم و يقدر
مش ليها منفض ومكبر
وماشى على الأرض يتمخطر
ديكور يضحك ويتغندر
وصهلله و عيشه وتفاريح
وأهله عايشين مجاريح
تشيل وتحط فيهم الريح
.
آه ياخسارة لما السند
عم وخال يبقى
هوى ودخان
عايش كسيح
أعمى وأبكم وأخرص
وقلب كما الصخر
قلب يساع قصاقيص
و كلاب مبذورة ع الأرض
تنبح على أى قريب
والعين مقفولة ب الصمت
والحية تطل براسها م خرم الباب
ولاتفتح وأنا سامع خطوتها
كلمة عم وخال
بقت جراح ف جراح
ونواح وهم وغم
ورياح وزعابيب وبرق
صوتها حزنها وأساها
جمرها غناها
ولاعم ولاخال شاعر بأوجاعك
فجأة الكل باعك
وإشترى خلخال
يشخلل خلاخيله
وخميته عمرانه بدلاديله
رافع قبقابه في وش أحبابه
ياه ..ياه الناس إتغير حالها
نسيت دينها وقرأنها
بدلت جلدها وباعت أرحامها
ياه ..ياه الناس بقت ألوان
تتلون كما التعبان
فقلوبهم الرحمه و العدل فخبر كان
وكله عايش صياد
غيروا طعم الحياة مر علقم
ياه...ياه نسيوا الطبلية واللقمة الهنية
واللمة والحنية والضحكة الشقية
نسيوا الوصية فاتو الجنة
واشتروا الدنيا وضحكة م الولية
ياخسارة على العم والخال
والأب لما يبيع الولد ب المال
ياخسارة ..ياخسار بشر غدارة
فاكرينها شطارة..مركبهم غرقانة
بالقسوه والذنوب سايدة دنيتهم
بقلمى سمية نور الدين محمد
ليست هناك تعليقات:
إرسال تعليق