لما كنا صغيرين
فى الزمان
إللى كان من زمان
قبل ما الشعر يبقى أبيض
لون قلوب الناس الطيبين
فى صلاة الفجر كنا على الآذان
كل واحد
واقف على باب من البيبان
والإيدين الصغيرة
ممدودة للناس الطيبة
كانوا قناديل المساجد فى الزمان
هات إيدك أه ياجدى
يلا بينا عند ربي
إدعى ليه نفسي أكبر
نفسي أطول الشمعدان
نفسي قلبي يكون منور
نفسي أحفظ الآذان
نفسي أحفظ آل عمران ويوسف
نفسي أكون مزمل صغير
نفسي أرتل البيان
لما كنا صغيرين
كنا طيبة وطيبين
مر بينا الزمان
مابقاش للطيبين
فيكي يا طيبة مكان
بعد ما إتهدت مساجد
وإتخفض صوت الآذان
بعد ما تاه الطريق عن عيونا
بعد ما إنكسر إللى بنا
بعد ما ماتت فينا الحقيقة
بعد ما الخوف أصبح مالينه
بعد ما قل الإيمان
ضاع طريق الحق منا
ضاع ياطيبة كل طيب
ما فضلشي إلا الجبان
والصغير والحقير
وإللى حامل ماباخير
مات يا طيبة فيكي الكبير
مات يا طيبة فيكي الكبير
مات وإمته تولدي تانى كبير
شعر
على أبو السعود
ليست هناك تعليقات:
إرسال تعليق