قبل ما أمشي
كلمتين هاقولهم اسمعيهم
افهميهم و لو تقدري انسيهم
قبل ما امشي
لو انتي فاهمة اني بالنسبالك
شيء مضمون و عالرف مركون
تبقي مش فاهمة حاجة
و من راسك لساسك غلطانة
كلمتين هاقولهم و اسمعيهم
افهميهم و لو تقدري انسيهم
قبل ما امشي
و يمكن امشي و مارجعشي
انتي يا هانم فاكراني
بس وقت العوزة
وقت حزنك
تجيلي و تحكيلي
همك و قهرك و وجعك
من فلان و فلانة
و علان و علانة
و عيونك مليانة دموع
باسمعلك أيوة باسمعلك
و أطبطب و أواسي
بكل حب و بكل رضا
و جوايا موجوع مقهور
من نار إهمالك لمشاعري
كاتم همي و باسمعلك
ابتسملك و اضحكلك
و اخفف من همك
تهمليني بالأيام و الأسابيع
و انتي هناك مشغولة
وسط ناس و مجاميع
وياهم تحكي و تضحكي
و لو سألتك غيابك كان ليه
جوابك بيكون بارد و تافه
و كأني مش من حقي أسأل
و لا اطمن عليكي
ف لحظة كل السنين اللي عدت
بتمسيحها بردودك الجافة
و ارجع أقول لنفسي
متقصدتشي يا واد متدققش
هي بس يمكن زهقانة
أو قرفانة و تعبانة
كلمتين هاقولهم و اسمعيهم
افهميهم و لو تقدري انسيهم
قبل ما امشي
و يمكن امشي و مارجعشي
انتي يا هانم راجعي نفسك
عمرك سألتي نفسك عني؟
ان كنت مبسوط ولا حزين؟
ولا ف يوم جيتي تطمني عليا؟
ولا ف يوم جيتي تسمعيني؟
قوليلي أفضفض لمين غيرك؟
على الأقل جامليني
خديني على قد عقلي
اثبتيلي انك شارياني
زي ما كنتي بتثبتيها زمان
و دلوقتي اطمنتي
إني ف ايدك مضمون
اطمنتي اني شاريكي مهما يكون
مفكرتيش اني مهما اتحَمّلت
هانفجر زي البركان
مهما صُبرت هايجي يوم
راح اروح و مارجعشي
ياما حاربت الظنون عشانك
أطردها من خيالي
و ترجع بإهمالك ليا تاني
حسيتي ف يوم إني
مشتاق أحس إنك رايداني؟
عاوز أحس انك بتقلقي عليا؟
عاوز أحس انك عليا غيرانة؟
كلمتين هاقولهم و اسمعيهم
و افهميهم و لو تقدري انسيهم
قبل ما امشي
و يمكن امشي و مارجعشي
أنا بشر إنسان لحم و دم
و لا إنتي فاهمة حاجة تانية
و الله أنا بشر باحب و أكره
و ليا مشاعر و أحاسيس
و ليا عقل و ضمير
أيوة باغلط لاني مش ملاك
ايوة مش دايما على حق
باعتذر لما اكون غلطان
بس مش كداب و لا جبان
ياما حذرتك من فلانة و فلان
تعاندي و تكدبيني
ف الآخر تتقرصي منهم
و تنكري اني حذرتك زمان
انا يا هانم دايما خايف عليكي
و مش حيطة بتداري فيها همومك
و تبكي عليها و تخبطي فيها
و هو انتي بس اللي إنسانة؟
كلمتين هاقولهم و اسمعيهم
افهميهم و لو تقدري انسيهم
قبل ما امشي
و يمكن ما ارجعشي
لا يوم أذيتك ف غيابك
و لا اتجملت عليكي
راعيت حق اللي بينا بأمانة
حافظت عليه و اتحملت كتير
سمحتلك تنفشي فيا و تصرخي
دا بس وقت زهقك و تعبك
و مش عمال على بطال
دا كان بطلبي ما انكرش
و نسيتي حقي عليكي؟
هو حقك بس اني اراعيكي؟
هو حقك بس اني احتويكي؟
هو حقك بس أطايب خاطرك؟
حتى الكلمة الحلوة مني
اللي من قلبي ليكي صافية
وقت الصفا بتمرريها
و تعكري بيها الصفو
و تبيتيني ف غم و هم
كأني لأحزانك و همومك
مجرد خزنة في دولاب
ناسياني لما تكوني فرحانة
كلمتين هاقولهم و اسمعيهم
افهيمهم و لو تقدري انسيهم
قبل ما امشي
و يمكن امشي و ما ارجعشي
سهل عليا أشاغل فلانة و علانة
معجباتي كتير مش غرور مني
فنان ، و دا طبيعي لأي فنان
و انتي عارفة و شايفاهم
ساعات بتسأليني عنهم
ما انكرش اني بجاملهم
دا حقهم واجب عليا
لازمي اوفي بالعرفان
و رغم غيرتك بتكابري
مع اني عمري ما خونتك
و لا مَيِّلت لواحدة منهم
عمري رديت عليكي ببرود؟
او قولتلك بتسأليني ليه؟
او سؤالك من الأصل ليه؟
شايفة حالك الاقوى
لا و الف لا و قت العناد
انا ماتغلبش و لا انكسرش
طول عمري راسي فوق
غصب عنك دا الوقع
و اللي يعرفني يشهدلي
الكلام خلص يا هانم
و انتهت خلاص الحكاية
بقلمي
مجدي شاهين
ليست هناك تعليقات:
إرسال تعليق