يوم اللقاء
=========
الـيــوم قابلـتـهـا والـشــوق يـعـصف بي
أمــــواج الاشــــواق ودتني وجـابـتـنــي
الله يــافــرحـــة الـخــاطــر وهي جنبي
جُـنّــت جـنـونـي وجــنـّت يوم شـافـتـني
قـالــت صـبــاح الـسـعـادة يامـنـى قـلـبـي
قـلــت انــتي الـصـبح ووروده تِـلافِـتْـنـي
من فرحتي تهـت عـن شرقـي وعـن غربـي
كـنــي مـلـكـت الـجـزيـرة يـــوم لا قتني
صرت ارتعـش وانتفـض مـا شالنـي صُلْبي
بـغـيـت اطـيــح بْمـكـانـي يـوم ضمتني
وقفـت مذهـول انـا وش صـار لـي وش بــي
يـوم انسـدل شعـرهـا النـاعم على المتـنـي
مــفرود مـالـفّته لـــفـــة ولا عــضْــبــي
فـاحـت عـطـور الطبـيـعـة مـنْه. وانشـتـنـي
تسـلـب عـقــول الـبـشربعيـونـها الـهـدبـي
اعــيون حـورا سـبـتـنـي واستـبـاحـتـنـي
في الفرس في الروم في الاعجام في العُرْبي
مهما طرا غيرهـا فـي البيـض. مـا اْغْرتنـي
أنـسـى جمـيـع البـشر لا صــارت ابْـقـربـي
وافـز فــي الـنـوم لـو فــي الحـلـم زارتـنـي
ماكـنـت مــن قـبــل اراها للهوى طـرْبــي
لــكـن فُـتِــنْــت ابْـحــلاهاواسـتـمـالـتـني
الـلي نقـشْـت اسمـهـا بضـلـوعي الـحـدبـي
وارويتـهـا مــن غـديــر الـحــب واروتـنـي
جذبـتـها فـوق صدري بـالـغـلا جــذبـــي
ثـم اْرْفـعــت طـرفـهـا نـحوي وسـالـتـني
تحبنـي؟قـلـت اجـل يــــا زادي وْشــربـي
مـالـي غـنـى عـنـك مهـمـا ايـامي اغنـتـنـي
حـبـك ملكـنـي وشــرّقْ بي وغـــرّبْ بـي
انـوثـتـك فـي جـنــون الـعـشــق.اثـارتـني
الـعـيـن تبـكـيـك شوق ودمعـهـا سِــرْبـي
والــروح هـامـت بحـبـك مااستشارتـنـي
ياسلـسـبـيـل الـخفوق ويـاروى غِــبّـــي
ياغـيـمـةٍ من هـجير الــشوق اظـلـتـنـي
صـبي حنـانـك عـلـى قـلـب الـعـنـا صـبــي
نـسـيـنـي اهــمــوم في دنــيــاي عـلـتـنـي
نامي على الصدر وانسـي الحُـزْن والكَرْبـي
يــامــن بنـظـراتـهـا احـيـتـني وامـاتـتـنـي
واسقيني الشهد مــن سَلسـالـك الحَـصْبي
مـن شـفـةٍ مـثـل لــون الــورد شاقتـنـي
طاب اللقـــا واكتمل فــرحي مع حبـــي
اللي بكـــامل مــعــاني الحــب احاطتني
وفزَّت على .رنةَ الجوال......... في رعبي
وجرّتْ من الصدر. شهقة واستثارتني
واستاذنَتْ للـــرجوع وطـــحت. منــكَبِّي
أقوى من الصـاعقة في الجسم صابـتني
ومن حسرتي ماقدرت اوقف وصرت احبي
لـيــن انـثـنـت لي وضمـتـني واقـامـتـني
يـانــاس انـــااحـبـهــا وادروبــهــادربــي
أمـشـي لـهــا لو جـميع الـنــاس لامتني
واسـجـدلـربي شـكر واحـمــدْك يـاربــي
يـــوم انـهــا صـوبـهــا الاقدار سـاقـتـنـي
بقلمي:مستورمحمدالحارثي
ليست هناك تعليقات:
إرسال تعليق