خضرة
اشعار : يحيي عبد العزيز
البنت خضرة صغيرة
شبت ف قلب المندرة
اتكحلت بالمكحلة
وعنيها بس مفنجلة
متشعلقة بقطر الجواز
لفت ضفاير شعرها
طالت لحد ضهرها
ف يوم خميس
وحميدة حوش مهرها
مستنى يسكن قلبها
ويكون عريس
وخضرة لفت ف البلد
وعدت على شيخ البلد
واتشعبطت عند الجدار
وجمالها لسه بيتولد
تستنى طلعة الولد
والفجر شقشق بالنهار
الكحل ساح على خدها
وحميدة يقرب منها
والشوق رماه
وجمالها زين عرشها
واتلونت مع شمسها
أجمل حياه
داب الولد ويا الجمال
عشق الولد بنت الحلال
زينة البلد
مقدرش يصبر ع الدلال
وراح على جسر الوصال
يطلب مدد
وراح لابوها يوم خميس
وقاله نفسي اكون عريس
أنا الولد
وقاله يا عم ونيس
الشبكة تبقى يوم خميس
يوم ما اتولد
ليست هناك تعليقات:
إرسال تعليق