غير رزقك مفيش
كانت قروش وصاغات
نجيب بيهم حاجات
دلوقتي ياولداه
حضرنا اللحمة بتلاته
وشرينا العجل بميه
وكان الألف جنيه
يكون مهر البنيه
وأكلنا وشربنا ياما
ويقولك .....
خلي الحساب عليا
كانت طيبة ونهيبه
والخير في كل حته
رحت السوق تجيب
رحت الغيط تجيب
والكل ف الدنيا سويه
الدنيا كانت عجيبة
كنا نحمد ونشكر
مع إن القبض قروش
والرضا مالي الوشوش
دلوقتي ....
الطمع أصبح ملينا
وعمره ما في يوم يسيبنا
والكل من بكره خايف
مع إنه نصيبنا يصيبنا
ياعم سيبك وكبر ...
في بكره أوعى تفكر
ربك هوه اللي دبر
لكل الخلايق تعيش
غالي رخيص ميهمنيش
الدنيا ماشية ودايره
هتاخد منها ياعمي
غير رزقك منها مفيش
بس أشكر ربك وعيش
بقلمي
صلاح شعبان الفيداوي
القاهرة
٢٨/١١/٢٠٢٢
ليست هناك تعليقات:
إرسال تعليق