((سيلفي من فضلك ))
بعد إحتياجي ولوعتي وضيق في حالي
ماشي ف طريقي وسكتي أنا وعيالي
قابلني واحد كان روش سألني مالي
قرب لي تاني ودمعته زارت خيالي
شفت ف عيونه كل عطف وقوام نداني
معرفش ليه حنيت اليه وكأنه خالي
ومراتي وأبني م التعب واقفين قبالي...
شكوى و وجوع صرخت في ودني بهمس باكي
أنا والعيال ليه محتاجين والأكل غالي ؟؟
رديت أوام على المدام بصوت خفيف
الرب راعي برحمته هو اللطيف ..
بصيت يميني على الغريب لقيته لف وراح بعيد
جلست مراتي والعيال على الرصيف
سألتني تاني بصوت خريف طب شوف رغيف
راح نقسمه أنا والولاد ...
جاوبت تاني ودمعتي سابقه الكلام
لطفك يارب بالعباد ...
ورفعت إيدي للسما بدعي و بشكي للحبيب
م الحرقة على وجع الضنا
يرسل الينا ربنا مدد وعون
أو أي لقمة صغيرة تشبع صغير كام سنه
أو كوب لبن يكون شفا
لرضيع مريض على كتفها
وفجأة شوفت من بعيد ضل الغريب
سريع بيجري بخطوته وصل و قصرت سكته
شايل في إيده كام وعاء عصير وماء وجالون لبن
وأكل يكفي 10 رجال .. ضحكت عيوني وقلبي رق
قالي الغريب خد يلا أكل.. كل وإنبسط وإياك تخاف
لم العيال وتعالى جنبي و إبتسم ...
وسألته ليه نضحك يابيه ؟؟ قام مد ايده من سكات
بحسب مساعدة وكام جنيه . أتاريه بيظهر نخوته على الهوا
ويقول ( لايف ) مع الصحاب يمكن يشوف كل البشر
وبسرعة المقطع ينتشر .. أصل الروش غواي الماقطع والمتابعة ولم ( فانز)
قلبي إتوجع نزلت دموعي في ثانيتين على شخص محروم وإنخدع
من شخص تافه كان قبيح . طلع خسيس ولا في شهامة ولا جدع
وغصب عني وكل فكري في العيال والجوع بيقتل جسمهم ..
آخدت (سيلفي ) ع الطريق وسط البشر وميدان كبير ..
لملمت عيلتي من سكات وسالت نفسي كام سؤال
معقولة في إنسان كدة ضميره مات؟؟
إرحم يارب بحكمتك محروم وطالب سترتك
راضي بأمرك من زمان قدري ونصيبي وقسمتك
فليرحمنا الله جميعا من كل ( مستغل واطي دون رحمة واحساس )
بقلم //
عماد سيد
ليست هناك تعليقات:
إرسال تعليق