قولوا لحبيبتي
***
بحلف بقلبي اللي حبك وصانك
ولا مرة خانك
وحرقة دموعي اللي هانت
ونزلت عشانك
أنا الغريب اللي رحل
من بعد ما عديت بحور
و حدود بلاد
قلبي خلاص كره السفر
كره البعاد
عطشان وراجع يرتوي
من كاس حنانك
***
أنا الأمير و السندباد
ببساطي لفيت البلاد
عايش كما الطير ع الشجر
بقلب عاشق مش حجر
حاولت أنسى بالبعاد
يمكن لغيرك ...
يدق من تاني الفؤاد
ولما طال بيا السهاد
رجعت من طول السفر
مهزوم ومكسور الجناح
لعشي القديم ف بستانك
***
أنا دمع ساكن من سنين
في عيون يتيم
و صوت حزين
في قلب مليان بالحنين
تعب خلاص ، مل السفر
راجع بشوقه للقمر
لكنه خايف م اللقا
يا هل ترى
لسه الأميره فاتحه شباكها
عماله بتعد الساعات ؟
والا الأمير اللي غاب
مبقاش على بالك ؟
***
يا أرض نماء
طرح فيها ربيع حبي
يانبضة شوق بتدق
في وريد قلبي
أنا لسه حلمي في قلبي ...
متداري ومتخبي
ليوم تكملي حكايتي
وتبقي قلبي ومرايتي
وف عنيكي أشوف فرحة
بلون فستان مع الطرحة
تعاتبيني على غيابي ...
بشوق وحنين
وترميني في أحضانك .
علي درويش
ليست هناك تعليقات:
إرسال تعليق