دنيا الجنون
دنيا الإنترنت
ماشي في طريقي وحيد غريب
عابر سبيل سواح بطوف
عيوني شافت بالألوف
والقلب شال حاسس بخوف
مليان ظنون مليان ألم
حبيت أدور ع الرفيق
لمحت ناس متجمعين
لقيته سوق مليان بشر
بشر ولابسة أقنعة
مش محتاحين غير منفعة
فيها اللي باع واللي أشترى
لقيتها دنيا موازية لينا
وعاملة زي المغسلة
بتلف حبة وتدور كتير
الباشا فيها زي الخفير
وشوش بتضحك وشوش حزينة
وشوش بتكذب وتستخبى
دنيا غريبة ملهاش قانون
فيها العجب
فيها الصفيح زي الدهب
فيها العجوز عامل صبي
فيها الولد عامل حكيم
فيها الحقير عامل ولي
فيها اللي صاحب الحريم
فيها البنات والأمهات
فيها اللي إدمن تعليقات
فيها الإشاعة والخبر
فيها الجبان عامل دكر
فيها النصاب عامل أمين
مهمهوش عرق سنين
فيها اللي عامل محترم
عنده التحرش شيء أهم
فيها اللي باع وهم وخداع
ولكل محروم قلبه ضاع
فيها البنات عاوزة الكروت
إن كان بكاميرا أو بصوت
فيها واحد باع ضميره
يسرق مجهود حد غيره
فيها شعر وفيها رعب
فيها قتل وفيها حب
فيها الشهامة والأصول
فيها الخاين مع دول ودول
فيها اللي دور عالفلوس
فيها اللي بيدوس النفوس
فيها القمر زي الفانوس
فيها الوحوش زي الناموس
فيها اللي عامل نفسه قاضي
مع إنه عاطل ولا فاضي
فيها اللي نايم تحت صور
ويقول أنا صاحب قصور
و في اللي عايشة في الأمان
وتقول أنا محتاجه لحنان
ياست غوري بلاش جنان
عيشي مستورة بضمير
أطفال بنات رجال شباب
الكل خاب فايرس وصاب
دنيا تلاقيها في كل إيد
القريب زي البعيد
تليفون و تاب في كل إيد
خرب بيوت فرق صحاب
دنيا الأوهام والسراب
دنيا بسببها العقل غاب
متجمعين علي إيه ياناس
ضاع الأمل مفيش خلاص
شبكة ونسجها العنكبوت
شبكة خلاص خربت بيوت
شبكة تواصل إجتماعي
شبكة ماليها أي داعي
شبكة فراق شبكة غباء
شبكة بتقتل الأنتماء
أعقل وتوب لم الولاد
منابك منها غير بعاد
إدمان الإنترنت
بقلم عماد السيد
ليست هناك تعليقات:
إرسال تعليق