صدى صوت الأمل
للشاعر الدكتور علي مسلم عجمي
-------------------------
أنا بـُـكرا .. وبُـكـرا بتـعرفوني
عند ما للأمل فتح عيوني ..
أنا الحاكي أنا التلفاز دوني
أنا علم السما والعلم ذاتو
على المريخ رح بتوصلوني
أنا يوسف أنا حسنو وصفاتو
أنا عيون الصبايا كحلوني
أنا المستقبل الجايي بثباتو
على صدر الأمل بيعلقوني
أنا جبران ورثلي حياتو
أنا قمح المحبة بيزرعوني
أنا السلم وأنا الحامل راياتو
وعلى راس العدالة نصبوني
أنا روح الشهيد وتضحياتو
أنا وسام الكرامة كرموني
أنا شعر الصبايا و هفهفاتو
أنا الحلم العطول بيقشعوني
أنا الخوري أنا الشيخ وصلاتو
للوحدة رسالة سلموني
أنا اللولو الصافي و تبريكاتو
على صدور الصبايا زينوني
أنا المارد على الظلم و طغاتو
أنا إنتو أنا يا تقبروني
الشاعر… د. علي مسلم عجمي
لبنان
ليست هناك تعليقات:
إرسال تعليق