وكأني
الشاعر / رضا البوشى
وكأني روح عفريت
على هيئة ملاك
او دايرة عايزة تتقسم نصين
لحظة سراب عايشة بين شطين
وكأني جماد بيدق الف شرار
نفسي اشتريلي روح بعود ياسمين
واسمع صهيل الخيل وضجيج البلابل
والياس يضحك على ضحكة الفساتين
والشمس ترجع تلالي
والحب يرجع فوق يومنا الحزين
لكن هيعمل اية الدفا في الخلق البردانين
وكأني مولود امبارح
العمر يوم واحد والطعم مر
زي حكاوي السنين
وكأني شئ نفسه يكون شئ
ماشي ع الارض بأحلام مجانين
وكأني بواقي عصير اخر قطرة
في كاسات
البني ادمين
وكأني نابليون او واحد م العظماء
مع اني لا باعرف اقول الشعر
زي جاهين
وكأني دود عايش على الفاضي
مع اني شغلانتة بياكل بني ادمين
وكأني ريش او هوا بيعيش
حمامة عايشة
في البرج العالي
مقصوص منها الجناحين
وكأني قهوة سادة
محتاجة اربع
او خمس فناجين
ليست هناك تعليقات:
إرسال تعليق