ثورة شعب
الميدان
الشاعر / رضا البوشى
سجال مع الخال / عبد الرحمن الأبنودي
هأكتب أنا يا حلوة انا إسمك
انا البنت الشقية وإنت أجمل بلد
ياللي إبتسامتك جواها بحر من العجب
قومي وطهري قلبي من الأوثان
وإشتياقي لحضنك كامل العدد
أنا المطرود من النسمة
عاشقك ترابك زي كل الأرصفة
حبك معايا في شدتي كان السند
آن الآوان يامصر تتولدي من جديد
آن الآوان النور يرجع يغطي شعرها
نغسل همومنا من جديد
وفي الميدان نرجع تاني
نتولد
توامين بروح واحدة
نفس الصفات تضمنا
نفس الجينات واحدة
ليساك يامصر عفية
ابية
ونيلك رافض ينكسر
يا اجمل كلمة في الموال
لا يهزك الزلزال
وبين عنيكي الهرم والسد
من كل السكك المشتاقة لطعم الحرية
من امنا حوا من ادم
من نبض العالم العربي الرافض
للعبودية
مش كل طريق رمله بيضحك
في بشر زي الطرق الواعرة
بتموت لما تشوف النور
لكن هنعدي مهما السور كان عالي
أنا عشى حر زي بلادي
وسكوتي رصاص وكلامي رصاص
انا قلمي رصاص قناص
وسنانة بترسم وشوش خضرا
بطعم الحرية
وياعمنا الفنان
كبر يا عم الصورة
ورينا صورة الميدان
ياحلاوة المنظر
نفس النظرة البريئة
الكل بقى واحد
لتنين بلون الورد
الفقرا والاعيان
جوة الميدان كل السنين وقفت
وعيال صغننين في الميدان
كبروا قبل الأوان
سجل في دفاتر مصر المحروسة
وإكتب ياتاريخ عن انفاسها
عن بلد النور فدادين الحور
مصابيح الفجر مروية بكاسها
عن طيبة ورع عن حتشبسوت
كل العالم شرق وغرب
رهن مداسها
من كل حتة في مصر من شوارعها الكتيرة
من السمر الشداد في أسوان
لأ خر نقطة في الجيزة
يا محلى إسم مصر
نور بايت ع الشفة
وصورة مصر في البرواز
أحلي واشهى من الموناليزا
يادي الميدان السكرة اللي جمع المخاليق
جمعنا كلمة مصر ورسمنا بالمسطرة
أول بداية الطريق
ورجعنا زي الأول
نحضن بعض تاني
بحق وحقيق
الثورة فكرة بتغير طعم السنين
والفكرة إبرة وفتلة ومكن شغال
الثورة عمال وطلبة فلاحين
إيدين بتغزل في الفضا
لا تنحني لعدو ولا يكسرها إحتلال
الثورة بكرة وبعد بكرة
لأخر نفس في الكون
مش عايزة نوم ولا لوم
ولا مستحيل ومحال
قالوا علية كسلان فلتان بتاع قَهاوي
مش قد حب الوطن و مالوش في الثورة
طلع الشباب من كل فج في الحواري
فاتح بطن الفجر جايب نهار بكرة
سطر بإيده ورسم أجمل ملحمة
حاصروا الميدان بالصدور وغيروا الدولة
مين اللي سرق الشمس من فوق سطوحنا
وكسر فرح الوطن وعتم حيطان روحنا
يا سوس بينخر في كل سنتي في الدولة
مش باقي حاجة تنباع غير ضحكنا وروحنا
أنا قتيل إبتسامتك يا معلمة الصبر
وفي الشدة مطيبة جروحنا
عواحيز سارقين دم الوطن ويبكبوا بالمناديل
شطار في المسخرة وأساتذة في التطبيل
إقتلني ما أنا كدة في الأصل ميت ميت
سلاحكم فاسد عجز زي الخيل
لكن وطننا الحر خط أحمر
شيال هموم زي الهرم والنيل
يا ثورة طاهرة أبيض من بياض الفل
طلع الشباب بينادي ووراه طلع الكل
خوفي عليكي أكتر من كدابين زفة
في قلوب متلونة لكن بطعم الغل
موجوعة وشكواها لرب السما لوحده
الثورة عيش حرية وعدالة
مش تغيير في اللون والعنين والشكل
يادي النهار السكرة الورد طلع
مع طلعة الأبطال
يادي الميدان
اللي وقع الخوف مننا
شمينا ريحة الدفا رجعنا تاني عيال
الصوت بيبرق رعد
مافيش اتقل من تقل الهم على
الأكتاف
قوم يا وطن
انفض غبارك وإركب حصانك
وعدي على بكره
الظلم لازم يركب مراكب الترحال
الله على ضحكة مصر لما رجعت تاني
في كل حارة ودار رجعت فيها الاغاني
وخلي كلمة مصر أول كلمة في قداسك
وأكتب أجمل خطبة عن شعبها الأسمراني
مصر أعظم نغمة تسمعها الودان
وأجمل كلمة في عبارات التهاني
مش كل من كتب بيتين شاعر
ولا كل من كتب القصايد خال
مين يمنع شعاع الشمس من الشروق
لو يوم رفض الخضوع لأوامر الترحال
محلي السنابل ساعة الحصاد
والسنبلة متعطرة مسقية بعرق النضال
جوة الميدان كلنا واحد
كلنا مصر
ومافيش صليب بيشتكي ظلم الهلال
الله على ثورة مصر بلدنا الحرة
ده تاريخ منقوش فوق العواميد
و يناير مع تلاتين يونية
بين الأيام دول أجمل عيد
فتح يا خضار الحلم الوردي
ينابيع فوق مصر بلدنا الحلوة
المصري زي الرمل عنيد
غير ياربيع كل الأوضاع المعكوسة
كسر شبابيك كل التقاليد
لون يا زمان قلبي بلون الثورة
وهات بكرة زي مولود لسه جديد
نونو ع الفطرة
يوم طلوعنا
مصر طلعت
مصر فرحت
مصر صغرت
ييجي ألف عام
الثورة ثورة شعب
وكان بطلها الميدان
ليست هناك تعليقات:
إرسال تعليق