بقا كده يازماني تخوني
وتسرق مني الأحباب
وتسيب الفُراق يوجعني
وما كُنت عامله حساب
حبايبي فاتوني يازمني
على فين رايحين يازمان
الدنيا قدمنا ضباب
الصاحب تاه من صاحبه
والاخ طلع كداب
نسي حاف العيش والدقة
وخدها عناد ف عناد
بقا كده يابن أمي وابويا
تقلبها عليه سواد
تخلي عدوي يفرح
وف ضهري كمان يغتاب
انا كنت فاكرك أخويا
وزي زمان أصحاب
اللقمة كانت تكفينا
والصبر فينا زواد
نسيت زمان يالحمي
لما كنت عيل غضاب
لأتفه حاجة تبعني
وتسد كل الابواب
مع إنك كنت صغير
يادوب مُراهق عَناد
اقول لنفسي دا عيل
بالراحة عليه لو غاب
ايام وليالي بشيلك
وتبعني بدون أسباب
بخاف عليك من نفسك
فكرك ده أصله خراب
أناني كده من يومك
عامل عنتر شداد
الكلمة واخدها لنفسه
والميزة عاملها حجاب
كان عادي ممكن اسيبك
ويقولوا إحنا الأسياد
كان عادي ممكن اسيبك
تبقا وليمة لكلاب
خد راحتك يا واكل ناسك
بُكره هاتجلي متساب
وهايشلك تاني يا جاحد
ولا اشوفك هايعشها عذاب
يابويا انا لسه بدادي
ويا امي لك عندي خطاب
عملت بكل كلامك
ما طلعت يوم نصاب
الوصيه محفورة جوايا
ياحببتي طلبك مُجاب
الرحمة ياصاحب الرحمة
ارحمهم يارب ياتواب
بقا كده يازماني تخوني
بقلمي/ جمال حلمي ابراهيم عامر
ليست هناك تعليقات:
إرسال تعليق