الراي
لو سدر الراي او نزل
المرواد في النار
والفكك منصل
يتحصن
ولا تتعارض كيه ولا
يتشوه البدن
والبصير طبيب الوجع
المكمن ومدكن
الكطيعه والفليته
والعصبه المردوفه
والكسر المركب وعادي
والشق في الحوض والبلية
والكالسيم ترمس وبلح
ولبن من ناقة بكرية
وتبقي المراجعة على
الاطراف
خوف من العورنه والقرقرينة
والبتر حاااااار لو مفصل
خطير القرار
ولو قادرين فى الوضع
نتحكم
لو سدر الراي او نزل
وامشوا وتعالوا وداك
عندو راي وده فكره
والليلةفي قاعة السلام
والموتمر بكره
استنزاف للزمن
وفرصة لحبكة فتنه
عشان تصبح مجهجه
بين اولادك والوعد بالصحة
احسن ما نخت البلد
فرق بلدان دائره المصلحة
نموت نتحرق نتقطع
ونتوزع كيمان علي الشتت
التراب
وسقي وعزق ورعي الفتنة
ما نخاطر ونفتح للثعالب
باب
وكل قانون في الدنيا كذاب
ناقص ومعاب
فيه الثغرة والاجحاف
وسلبيات تنتهك مصالح
ناس
الا قانون الله متين
عروة لا تنفصم ولا تلين
لو سدر الراي اونزل
ابقوا عشرة علي البلد
واعيدوا ترتيب البيت
من جديد
وقبل السقف رص الحطب
والسباليق تشيل السيل
ان الرعد طقطق
احموها الدار اللاسلام
مسمار القلب
اللهم احمي بلاد الاسلام والمسلمين
من الباس والشتات واجمهم في
البيت الحرام احباب
اللهم امين يارب العالمين
اللهم صلي وسلم وبارك على سيدنا
محمد وعلى آله وصحبه اجمعين
الطيب عثمان الطيب
ابو نبيلة
ليست هناك تعليقات:
إرسال تعليق