دنيا الأغراب
إرفعوا الديانه م البطاقه
خلاص راح زمن المحبه والرباط وبقينا أغراب
عايشين في غابه زي الديابه اللي بياكل ف الناس
واللي بياكل في بعضه واللي بيقطّع في ناسه
واللي بينهش ف لحم اخوه واللي بيقتل أمه وأبوه
واللي بيعتدىٰ ع الناس لا عنده شعور ولا إحساس
واللي لسانه فاليت دايما رغاي مش ساكت
واللي معاه قرشين طالع كلامه على طول شين
فاكر نفسه قارون بين الناس عامل فرعون
ماتت القلوب والرحمه راحت فين مش عارفين
عاملين أحباب قُبل وأحضان وف الحقيقه أغراب
واللي ع القهوه واللي ف الشارع واللي ع المدنه
وجوه الجامع واللي عايش في حاله
والدم عادي راحت الوانه بقىٰ مستباح في مكانه
واللي بيجري ورا رغباته عايز يعيش حياته
اصله عبد لشهواته ياكل ويشرب يجري ويلعب
وع القهوه يقعد طول النهار طوله ودومنه وهزار
عمره ماعرف العيب بيرُد زي الديب
لا يعرف رحمه ولا يعرف معنىٰ العيب
والكلام الطيب راح فين غرق ف البحر
واللا اندفن ف الطين
دنيا عجيبه وناس غريبه وكل اللي فيها أغراب
ابراهيم محمد آدم
ليست هناك تعليقات:
إرسال تعليق