عمال مصر بلدنا
الشاعر / رضا البوشى
مفتتح
حبيبتي مصر
وحسنك جنن العاشقين يا مذكورة في كام اية
شربت هواك ياسنيورة في كبسولة وحباية
قطعت كل شراييني لقيتك برضوا جوايا
حبيبتي مصر
إلى عمال مصر بلدنا
يا أصل مصر المحروسة
وفي الأصول إبن الأكابر
يالوز مقشر يا مسطرين
يا كفوف عفية مولودة
جوة العنابر
يا غصن بان
وبياض قلبك ولا قطن حرير
يا عود ياسمين يا قصب سكر
ياأبو إيد تتلف في شال كشمير
والشمس عروسة بتتعايق
لابسة الفساتين الله أكبر
أبيض أخضر
والورد البلدي بيصبح باعت مراسيل
تملي الكراتين
والديك بيدن كوكو كوكو
يا صنايعية
مين في البلدي شغال زيك
يا اسطى عطية
يا إيدين يا صوابع بتنور جوة الفوانيس
شواكيش بترسم عالسكة
صورة مولود أبيض في أبيض
نايم على خده جمال بكرة
ويا عم حسين
قلبك مكنة شغالة بروحين
الروح الأولى
ريحة مصر بلدنا الساكنة فوق الكتفين
والروح التانية
روح مينا وصلاح الدين
في ناس عايشة كده جنب الباب
زي القطة
بتقضي حياتها ع السلم
وكفوف شقيانة
بتطلع مية
من قلب العتمة
لا يهدنا خوف
ولايوم سلمنا لموج اليأس
و نستسلم
إحنا اللي شقانا بكام نكلة وكام تعريفة
إحنا صوت المكن الحر
في أول مايو
يطق شرار
ومكاننا ينطق بلسان كل الأحرار
إحنا السلاطين وإحنا الامراء
ومكاننا في صفوف مصر الأولى
بلون الثوار
إحنا الضل اللي بيضلل
فوق الأعيان
لما تجف الزرعة
عرقنا مطرة تدب
تصحى من تاني الأزهار
ليست هناك تعليقات:
إرسال تعليق