وبعدين يادنيا
وبعدين يادنيا فيك وف عمايلك فينا
حرام عليك كفاية كده علينا
قدمنالك كل اللي يرضيك
ومافيش فايده أبدا فيك
شغل ليل ونهار وإزاي نراضيك
كل يوم زيادة في الأسعار
لغاية م الحياة بقت نار
وصاحب البيت على هواه بيرفع فى الإيجار
وفواتير كتير مولعة والكل محتار
والمعاش ثابت ومنين نجيب النابت
حرام ياناس اللحمة بقت بكام
والفراخ بقت شاسيه من غير حزام
وياهناه اللي يقدر يشتري فول وطعمية
واوعى تفكر في الجبنة والزيتون
حتى المش بقى منهم واتعلم الجنون
والبيض في الطبق محدش قادر عليه
ترفع له القبعة وأنت داخل عليه
قلنا الأسعار نار قالوا إحنا معاك إوعى تحتار
دا أنت العين والنيني ودم ف عروقنا بيسري
عملنالك خيام في كل ميدان
ومنافذ كلنا واحد والجلاء وأمان
وعشان خاطر ولادنا وحبايبنا تحيا مصر
قلنا نشوف الأسعار فيها أخبارها إيه
لقينا كرتونة الغلابة من ٥٠ ل ٧٥ جنيه
والزيت والسكر والرز مين يقدر يشتريه
واللحمه ب ٢٢٠ جنيه والفرخه ب ١٣٠ جنيه
طب الغلبان دخله أد إيه ويأكل ويشرب إيه
ده من غير الكسوه وحجات الولاد والنسوه
ابراهيم محمد آدم
ليست هناك تعليقات:
إرسال تعليق