..........بكره ليك.......
أوعى خوفك يبقى أكبر
م اللى يعنى حلمت بيه
أو تسيب الجرح يكبر
أو تسيب حزنك يدقدق
فى الأمل ويدوس عليه
لو إيمانك جوا منك
راح تعدى المستحيل
فأوعى وجعك يكسرك
فتعيش ذليل
كسر القضبان وطير
كل حلم وليه تمن
كان صغير أاو كبير
كمل المشوار وغنى
زى عصفور الصباح
وإرمى حملك
عاللى خالقك
تلقى كل الكون براح
بكره تلقى الفجر جايلك
جاى بألف ومية صباح
بكره تلقى فى ليل دموعك
ورد طارح عالشطوط
بكره ترجع لإبتسامتك
تمحى م الوش الخطوط
بكره هاتحس السعادة
فأوعى حلمك فيك يموت
مهما كان الحزن اقوى
بالأمل حتماً تفوت
.................
اشرف الشناوى
شاعر عاميه
المنصوره
البرامون
ليست هناك تعليقات:
إرسال تعليق