زجل
خلي القمر
حردان
وهالقلب يخفق بنبضاتو
وحواش حبق حاكورة
زاهي بورداتو
والسوسن مغمض
ونعسان
وبيتنا وعرايش زهور
وزاروب وجرن وتنور
وخبز ناضج متل
خدالصبيه بجمراتو
وكحلة العينان
وبرد كانون
والمقلي والسانون
وقرامي حطب
وكومة حكايات
وقلوب نقيه
للمحبة آيات
وتلج وزمهرير
وموية غدير
وشال الصبيه حرير
الي غزل خيوطو
وطرز حواشيه
يسلمو دياتو
عزف ناي حزين
وشوق وحنين
وذكريات تخمين
وبيت كتيردافي
وحواكير وحفافي
ماحلا حكاياتو
واعراس ضيعتنا
وشباب وصبايا
يشتروامن الشيني
عطور بالقنيني
وحليب ولبن وشنيني
وكحلة ومشاط
ومرايا
وحلوات وقدود ميالا ه
تهز عالميلين
وشاعر يتمتم بقصيد
وغناني مواسم حصيد
متل فرحة العيد
يرتل بأبياتو
وفلاح وفلاحة
وبيادر وسنابل
بهالساحة
وبيي ماسك المدرايه
وامي بشالها مخبايه
وتحلف وتتحلف
ببركاتو
وتتبارك بخيرحباتو
وجني مواسم
وافراح وخواتم
وعنب وتين
معبي بسلاتو
سليمان أباالحسن
المكزون
ليست هناك تعليقات:
إرسال تعليق