(عيد العمال.. و إلى بعض ارباب العمل) : للشاعر الدكتور علي مسلم عجمي
------------------------------
عيد التعب و العرق و الزند المتين
بواحد شهر أيار عيد المنتجين
بواب بستنجي و مخزنجي أمين
عامل نظافة و نص ثوبو مهتري
و متل الشتا بينزل عرق فوق الجبين
ما عاد زندو العامل بلحمو طَري
صار قاسي و صلب مفتول و رزين
تحت البرد و الحر زنده الأسمري
شغَّـال تا يطعم ولادو الجايعين
كلما تِعِب بيقول يا نفسي اصبري
من البيت خلص الأكل حتّى و الطحين
بشتغل حتّى موت أهون من ثـري
أوقف عبابو بذل و بحكيو مُهين
يا أمم يا تواريخ يا شعوب اذكري
بأيار واحد عيد كل البائسين
***********
يا كل عمال الخليقة توحدوا
و ارفعوا شعار الإنتاجية و جدّدوا
بكل المصانع في لكم عزم و ثبات
بهمة و نشاط متابعة ما بتقعدوا
وين ما تكونوا بشغلكم إنتوا نواة
ما بتنتهوا من عمل حتّى تبتدوا
مجمع خلية نحل أسرة عاملات
بإخلاص و تفاني الضمير بتفتدوا
سقيتوا بعرقكم للأرض ماء الحياة
و وقت التعب أجمل قوافي بتنشدوا
العامل بيبقى من شبابو للمماة
يكدح و يعطي .. شيبتو ما بتبعدو
رغم البرودة و كل شي فيها قساة
بتعملوا و زنودكم ما بيبردوا
و بالصيف ساعة ما الأشعة مسعرات
غلال الزرعتوا بالشتا عم تحصدوا
مبروك يا عامل إنت طوق النجاة
و عيدك بأيار جينا نشهَدوا
***********
إلى بعض أصحاب العمل
---------------------------------
إياك تظلم عامل و تظلم أجير
و تظن حالك صاير عليهم أمير
صاحب عمل خليك متواضع كتير
تصرف بحكمة عالم و نخوة فقير
إياك تظلم حدا و تقرر مصير
موظف حسب أهواءك و تشخر شخير
المظلوم في ربّو أكيدي بيستجير
و يا ويل ويلك من غضب الله الكبير
لولا تفاني موظفينك يا مدير
ما كِبِر مشروعك كِنت باقي صغير
و لا كان عندك فيللا ومالك وفير
و سيارتك في سعرها بتنقذ أسير
و تا ما يقولو الناس عنك مفتري
إياك تظلم عامل و تظلم أجير
الشاعر د. علي مسلم عجمي
لبنان
ليست هناك تعليقات:
إرسال تعليق