قصيدة / عامية
........................................
دنيا بتلعب بينا ياصحبي
أوعة تقولي لسه أماني
وأجمد كده بطل خوف
ولا تقول الفرحة جيالي
وتيجي تهني بضرب دفوف
أصل ياصحبي حالي بقا مايل
والدنيا ياما أدتني كفوف
صحيح أيامي كرهة نظامي
وماشيه عكسي فين مابروح
جاي تقولي اضحك تاني
أزاي ياصحبي وانا كلي جروح
كنت زمان بضحك من قلبي
وأحنا تلامذة كتاب مفتوح
كنت ساعتها حاسبها كويس
وشايف بكرة يرد الروح
بتقولي أرجع تاني ياصحبي
أزاي بس وكلي شروخ
عايزني اضحك ماشي ياصحبي
وهابكي ف سري بصوت مدبوح
شُغل السيما تعبني وقلبي
ياخسارة يادنيا وشك مكشوف
الدنيا رواية كتبها مخضرم
ومخرج روعة عينة بتشوف
تمثيل بنشوفة حاجة تحزن
وكلام موزون جواه مغشوش
أديني أمارة أمسك فيها
لأبقا ف نظري واحد ملطُوش
ماشي ياصحبي هامسك نفسي
وأكتم حزني جوه الجوف
خلاص تمام هاخد بنصيحتك
وهاعمل نفسي حد مكفوف
وهاعيشها الدنيا حد مُهرج
وأضحك تاني حلاوه روح
أصل الذمة تعبت روحي
وكتر اللعب ملاني جروح
ساعات ياصحبي بحاول أجاري
وأعمل فيها سعيد مشروح
لا كن ضميري وبخني شتمني
وسابني افكر كده وأدوخ
دنيا بتلعب بينا ياصحبي
بقلمي/ جمال حلمي ابراهيم عامر
ليست هناك تعليقات:
إرسال تعليق