ذكريات من زمن فات - تأليف / ناصر يوسف عيسي
اسمعوا منى يا جماعه راح اقول كلمات
فيها مواقف م الحلوة وفيها كمان بعض الازمات
كنا نروح المدرسة بمريلة تيل ناديه بيچ او كاروهات
وكنا بنصحى ستة الصبح وماما تعمل لنا سندويتشات
والبنات تعمل ف ضفاير وشرايط فى الشعر و فيونكات
وكانت لما تغيب الابلة فرحة كبيرة ...مفيش واجبات
ولو شوفنا الاستاذ فى الشارع كنا بنهرب فى الحارات
لان الاستاذ شربينى ده توربينى وكلامه كله تهديدات
وكانت ابلة سيدة ايدها سخية جيدة توزع علينا البان وتوست و حلويات
وكان نفسنا نوصل سنة رابعة ونخرج م الفصل نلعب فى الحوش والطرقات
وكل املنا نكتب بالقلم الجاف ويبقى معانا فى الشنطة كراسة رسم والوانات
ولما الاستاذ يديلك شوية ورق او طباشير للفصل التانى ومعاهم حبة دوسيهات
كنا بنفرح ونحس اننا مبعوث الامم المتحدة امام أصحابنا ورايحين نحضر اجتماعات
والبنات كانت لعبتها نط الحبل او حتى كبه واستغماية او حجلة وعروسة قماش وهن طبعا امهات
والاولاد العابهم عجلة كازوز او ذهابهم للأراجوز وتأجير عجلة وترونجيلة وسبع طوبات
واوعى تنسى الليدو والسلم والتعبان وعمل طيارة ورقية تطير فوق البنايات
ولعب البلي والنبلة وتريك تراك وبنك الحظ ومبالغ مالية كبيرة بالألوفات
ياريتها دامت الروح الحلوة وصفاء النفس وحب الخير لجميع الناس كل الاوقات.
ليست هناك تعليقات:
إرسال تعليق