بطلنا نكتب عربي
وخلينه وية اللي يهوسون
مافاد صدر وعجز
اثاري الجماعة وحدهم يسولفون
مانفع صبر وياهم
ياعمي شبعنا أقصاء
هم أنتوا مثلنا للما يعجبكم تقصون
يومية عدكم فرح
شوية من فرحكم ماتنطون
معرس ويومية واحد
لاحامض لاحلو من صينيتكم تقدمون
هذا أمير الشعراء
وذاك متنبي وأخطل والكل يشعرون
وذهب وفضة لفلان
وشرفنا سيادة الخلان وية اللي يصفكون
يومية نسمع خبر
ونكول بلكي باجر بينا يذكرون
لاحس ولاخبر صنطه
وعلى هل الحال الجماعة يطنشون
ست وأستاد فدوة
ظهره ألنا وأللهم بطن الماعون
أخ من الوكت أششوفنا
كلها محسوبية ترضون لوما ترضون
داري شوية بالبخت
وأنصف بعينك الناس ألها عيون
وسفة وحسافة وحسرة
تعبنا الحروف كلنا يمكن يعجبون
طلعوا الجماعة حالفين
حلف قريش لايبيعون ولايشترون
ياعمي الدنيا متسوة
هذا مو سوك عكاظ وتتناظرون
خلي لمتنا ببستان
ناس تفرش وناس يضيفون
واذا حجينا شل بالتبن
فسلام منا عالمادروا وعل يدرون
هو لو يصير ينشرا
جان أشترينا حظ من اللي يبيعون
بقلمي..........محمد...........هي كَوة
ليست هناك تعليقات:
إرسال تعليق