شفت منام
إني فِ ندوة مع الشعراء
بسمع صوتي على استحياءْ
الشِعر دوا
وكتير بيكون الموت والخوف والداءْ
وجاهين
قصايدهم أجمل شِعر وأحسن زاد
غناويهم رحلة طويلة
بتطوي بلاد وبلاد
تسمعهم وكأنك شايف جوّه قلوبهم
حلم وورد لأول حب ..
وأحلى معاد
غناويهم تشفي الروح والقلب
وتزرع ملوِ الأرض هَنَا وأعيادْ
قلتلهم
أنا مجنون بالشِعر ، وعارف
إن الكلمة لهيب ومرار
أنا مجنون بالشعر
لآخر نقطة ف دمِّي
وقولوا ( غريب الدار )
ردّ عليا فؤاد حداد ..
تقدر توصف عشق
وتعرف تمدح جار
تعرف ترسم فرحة بكلمة
نشوفها نهار
الشعر ربيع وسَما
مش رص كلام
الشِعر كتاب مفتوح ، سهل وممنوع
زيّ الأحلام
ساحر والسحر حلال
وعليه مِ القلب سلام
الشاعر صيّاد مفتون بالبحر
وواخد مِنُّه هواه
لمّا ججارة الأرض بتسمع شعره
تقول : اللهْ
الشِعر حكاية طويلة ف بيت واحد
يحكيها الكون ويَّاه
الشِعر وتَـر .. الشِعر أمل ..
الشعر حياةْ
اكتبْ نبضك شعر ،
وإرسم حرفك نورْ
مِدّ خيالك يطرحْ فرحة ..
يعدِّي السور
إيّاك تيأس مِ العتمة ..
ده بعد العتمة صباح وزهور
حلمك مش مخلوق للحبسة
وأرضك لسّه عفِيّة ،
ما هِيَّاش بُور
الشعر حقيقة بتلعن كل الكدب
وكل الظلم
وكل الزور
بقلم الشاعر السيد العبد
ليست هناك تعليقات:
إرسال تعليق