أوعى تخاف
حاول ترجع
زى ما كنت
ركب فى ملامحك
والناقص منك
ارسمه بالتقريب
عافر فى الليل
عن حلمك
لو حتى الصبح
مجاش
مش كل اللى
يخش الإنعاش
بيموت
واضحك لو لسه
فى قلبك
حتة براح
الفجر بيجى
وكفه مليان أفراح
طبطب على روحك
جواك
دا محدش ها يحس
بوجعك إلاك
الخوف بيهد
حيطان الأمل المبنية
ويسد أخرام النور
وبيحبس روحك
زى العصفور
الخوف مايخفش
إلا من الضى
إنما فى الضلمة
بيفضل حى
فأوعى تخاف
م الليل
أو من عفاريته
وافرش أمانيك
لو جرحك حتى غويط
الأمل اللى أنت زرعته
هيملا الغيط
والتوتة هترجع
تانى تضلل عالبيت
حاول ترجع
زى ما كنت
بس أمسك طرف
الخيط
ولحد ما ترجع
تانى الشمس
وتدفى الكون البردان
أعملك فنجان
قهوة
الدنيا بترمى الحظ
فى أيها داهية
زى الساقية
أما تتدور
وبتسقى غيطان
البور
حاول ترجع
زى ما كنت
الهوى ما بيقلعش
إلا العود المكسور
قوم غنى الغنوه اياها
وإفرد فى جناحك
على كل الملكوت
واضحك على قد ما تقدر
قبل ما توصل للآخر
وتموت
اشرف الشناوى
شاعر عاميه
البرامون
المنصورة
ليست هناك تعليقات:
إرسال تعليق